На денешен ден, 13 ноември се ослободи Скопје. По тој повод ќе пишуваме убави работи за Скопје, да заборавиме на неубавите работи кои се случуваат последниве години на нашиот главен град. Да зборуваме со љубов како кога раскажуваат старите Скопјани, за некои убави времиња, времиња на прекрасна дружба.

Скопје, град на младоста, центар на цела Македонија, политички, културен, економски и академски центар на земјата.

Градот е дом на бројни културни институции, вклучувајќи го Македонскиот народен театар, Македонската филхармонија и Националната галерија. Во Скопје се одржуваат познати фестивали како Оф-фест, Скопско лето и Џез фестивал Скопје.

Еден од помалку познатите факти е дека Скопје е еден од постарите градови во Европа,со историја која датира повеќе од 6.000 години наназад. Археолошките ископувања покажале дека овој регион бил населен уште во неолитскиот период.

Кога зборуваме за Скопје не можеме да ја изоставиме Старата Скопска Чаршија, една од најубавите чаршии на Балканот која своевремено била центар за трговија за време на Османлискиот период, мешавина од различни култури.

На 26 јули 1963 година, се случува разорен земјотрес со јачина од 6.1 степени според Рихтеровата скала. Околу 80% од градот беше уништен, а животот го загубија повеќе од 1.000 луѓе, најголемата трагедија, најтажната случка во историјата на Македонија. За таа цел обично на 26 јули се случуваат културни случки и комеморации во Скопје каде што скопјани се сеќаваат и оддаваат чест на трагично загинатите жртви.

Една од убавите работи поврзани со Скопје е секако Водно, се наоѓа веднаш над градот, а на нејзиниот врв е поставен Милениумскиот крст висок 66 метри, изграден во чест на 2.000 години христијанство. До него може да се стигне со жичарница.

Градот на студентите, на младоста, на забавите, на концертите на културата. Разнобојни локали, ресторани, галерии, најразлични манифестации ни нуди Скопје.

Скопје има славни маала, Дебар мало не е шала!

Со љубов за нашиот главен град, со љубов за Македонија, нашиот дом, напишано од некој што не е по потекло од Скопје.

Ајде наздравје, Скопје!